पिंपरी, प्रतिनिधी (दिनांक. २५ ऑक्टोंबर २०२६) – प्रभाग क्रमांक २२ मध्ये महाराष्ट्र राज्य मार्ग परिवहन महामंडळाच्या (MSRTC) वतीने देण्यात येणाऱ्या प्रवास सवलतीच्या कार्डचे वाटप नगरसेवक संतोष कोकणे यांच्या हस्ते करण्यात आले. या उपक्रमाला परिसरातील नागरिकांचा उत्स्फूर्त प्रतिसाद मिळाला.
एसटी महामंडळाकडून विविध पात्र प्रवाशांना प्रवास सवलतीचा लाभ देण्यासाठी स्मार्ट कार्ड अर्थात NCMC कार्ड प्रणाली राबविण्यात येत आहे. शासनाच्या विविध प्रवास सवलती अधिक सुलभ, पारदर्शक आणि डिजिटल पद्धतीने उपलब्ध करून देण्यासाठी ही व्यवस्था करण्यात आली आहे.
या उपक्रमांतर्गत नागरिकांना कार्डबाबत मार्गदर्शन करण्यात आले तसेच पात्र लाभार्थ्यांना कार्डचे वाटप करण्यात आले. विशेषतः ज्येष्ठ नागरिक, अमृत ज्येष्ठ नागरिक, महिला आणि इतर सवलतधारक प्रवाशांना या सुविधेचा लाभ मिळणार असल्याने नागरिकांनी समाधान व्यक्त केले.
यावेळी नगरसेवक संतोष कोकणे यांनी नागरिकांनी शासनाच्या विविध योजनांचा लाभ घ्यावा, तसेच एसटी महामंडळाच्या सवलतीच्या सुविधांचा अधिकाधिक उपयोग करावा, असे आवाहन केले. नागरिकांना शासकीय सुविधा मिळवून देण्यासाठी अशा उपक्रमांचे आयोजन सातत्याने केले जाईल, असेही त्यांनी सांगितले.
एसटी महामंडळाच्या NCMC स्मार्ट कार्डमुळे सवलतींची नोंद अधिक पारदर्शक होण्यास मदत होणार असून, डिजिटल पद्धतीने प्रवास सेवा उपलब्ध होणार आहे.
या वेळी परिसरातील नागरिक, लाभार्थी आणि कार्यकर्ते मोठ्या संख्येने उपस्थित होते. कार्ड वाटपाच्या उपक्रमाला मिळालेला प्रतिसाद पाहता नागरिकांमध्ये या सुविधेबाबत चांगली उत्सुकता असल्याचे दिसून आले.
